عکّادن قرادن بیروته گتمکدن مراد عالیلری مکشوف یاران الهی ایدی ذات مدبّرانه‌لرینه موجب تنبّه اولمق مقصدیله قرادن گتمکدن منع و بحراً عودتکزه تصریحاً تنبیه ایدلدی فقط ذاتکز مقصدکز بزه مجهول‌در ظنّیله بشقه درلو بر تدبیره قالقشوب صیدایه تشریف و اورادن قصره عودت بیورجقلری مسلّمدر حین حرکت بو مقصدکزی تصریح ایده‌جگم امّا شاید منع ایدیلور یاخود اغبرار قلبکزه موجب اولور ملاحظه‌سیله بر شیء دیمیه‌جکمه سبب مستقلدر فقط حسب المحبّة سزه بر محبّت روحانیه‌م اولدیغیچون بر شیء افاده ایده‌جگم او ده بودر که حضرت مسیح علیه السّلام بیورمشدر شعشعه و شوقی جهانی نورانی ایده‌جک بر شمع شب‌افروزی کیمسه دمیردن بر فنار و فانوسک آلتنده براقمز بو سوزه دقّت ایله بلکه او شمع نورانی‌یی غایت پارلاق بر فنار ایچنده یاقارلر بو اشاره‌یی بشارت بیل سرّ حقیقت شمس هویّت افقی فوق‌العاده حلاوتلی اوله‌جق‌در قرا بلوط ایله مختفی اولمز آکلا بو کنایتی الواح الهیّه منشوردر یعنی هرکس نزدنده مشهوردر مطویّ و مخفی بولنمز فهم ایت بو صراحتی انصافک وار ایسه اشته سکا حجّت بالغ اولدی سنی حضرت احدیّته حواله ایدرم یاورم گوزم والسّلام ع ع