احبّای ایرانیان علیهم بهآء اللّه الأبهی
سوگلی یارانم دوستمز محمّد خان حضرتلری ارض مقدّس‌دن ایرانه عودت ایدریکن باطومده بولنان شانلی ایرانلی یارانمزی تطییب خاطر ایتمک اوزره سزه خطاباً ترکجه بر تحریرات مشفقانۀ پرقیمتی رجا ایتمکده‌در بز ایسه معتاد بولندیغمز لسان یالکز فارسی و عربیدر فقط اوراده بولنان یاران حقیقی و احبّای صمیمی اکثرلری ایرانلی ترکان پاکان بولندقلری جهتله تحریراتی ترکجه یازمق فی‌الحقیقه دها اولی‌در مقصد اصلی ایسه آنجق معانی دلنشین و مضامین شکّریندر هر نه لسان ایله اولورسه اولسون مطبوعدر مقبولدر مرغوبدر بناءً علیه معتاد اولمدیغم لسان ایله شو تحریراتی یازدیران آنجق سوق محبّتدر احساسات وجدانیّه و انبعاثات روحانیّۀ صهبادر الفاظ و کلمات ایسه جام مصفّادر صهباء جانفزا نشئه‌بخشا اولدیغی حالده قدحه او قدر اهمّیّت یوقدر وارسون طپراقدن چوملک بر چناق اولسون نشئۀ صهبا و لطافت بادۀ حمرا کافی وافیدر حضرت احدیّت بزم الستده جام ابریز محبّتی لبریز و نشئه‌انگیز بیوروب عزیزلری سرمست پیمانۀ عهد و پیمان ایلدی او نشئۀ روحانی روحانیانک دماغنده دوام و استمرار ایتمکده‌در بناءً علیه سرمست جام الست اولان یاران می‌پرست هر زمان جمال ذوالجلاله مفتون و سعادت ابدیّه‌یه مقرون‌درلر سبحان‌اللّه بو نه عنایتدر بو نه موهبتدر حقّا قدرنی تقدیر ایتمک آنجق اهل عرفانه مخصوص و واقف اسرار نهانه مرهوندر یوخسه طیب مشمومدن هر مزکوم محروم اولدیغی گبی غافلان دخی نشئۀ صهبای الستدن بیخبر بر طاقم تن‌پرور و خلق ایسه البقر علی صورة البشردرلر بناءً علیه سراج هدایتی زجاج قلوبده ایقاد ایدن حضرت کبریایه شکر اولسون که بزم گبی هجران و حرمانه مبتلا اولان بندگانی خلوتگاه احدیّته دلالت و درگاه الوهیته هدایت بیوردی بز هر نه قدر اهل قصورز او ربّ غفوردر بز عباد پرخطایز او خداوند پرعطادر دقّت ایتملی باقک بز محروم ایدک محرم راز ایلدی مأیوس ایدک عجز و نیاز ایله دمساز ایلدی بی سر و سامان ایدک ملجأ و پناه احسان ایلدی مادام بو فیض قدیم ایله گوگللری تزئین بیوردی شکرانه ایله مقابله ایتمک لازمدر شکرانه ایسه حقیقت انسانیّه‌یی تزیین ایدن اک پارلاق فضائل و خصائل حمیده ایله متّصف اوله‌رق بین البشر سنوحات رحمانیّه‌یه مظهر اولمق عالم انسانیّه‌یه بیوک بر خدمت ایتمک و کافّۀ بشر ایله حسن معامله ایلمک مهربان اولمق و عموم ایله صداقتچه دیانتچه امانتچه معامله بیورمق و جناب حقّه عبادت و عبودیت ایتمکدر بر ده هیکل عالم امراض مزمنه ایله بیمار و معتل اولمشدر بناءً علیه جناب کبریا بر طبیب دانا و حکیم توانا انتخاب بیوروب بو هیکل مجسّمک معالجه‌سنه دلالت بیورمشدر عالم وجودک صحّت و عافیت و سلامتی نقطۀ نظرندن بو بر بیوک احساندر امّا نه فائده که انسانلر جاهل و بشر بیخبردر ربّم سزی تأیید بیورسون و توفیق ایلسون تا که سنوحات رحمانیّه ایله عالم انسانیّتی نورانی و روحانی بیوروب نتیجۀ هدایت اولان حیات ابدیّه‌یه و سعادت سرمدیّه‌یه موفّق بیورسون آمین