ای بندگان حضرت کبریا قفقاز فارسیجه کوه قافدر اسکی زمانده اهل عالمن

بواسطۀ جناب زائر آقا سیّد مهدی قراباغی

تفلیس

احبّای الهی علیهم بهآء اللّه الأبهی

هواللّه

ای بندگان حضرت کبریا قفقاز فارسیجه کوه قافدر اسکی زمانده اهل عالمن اعتقادی اوزره جبل قاف سیمرغ الطافن یورد و یووه‌سیدر هر نه ایسه فال خیردر و او مرغ عظیمک سیرگاهی مشرق عزّت اولدیغنی سویلرلرایدی بو سوزن حقیقتی شویله اوله‌بیلور که سیمرغ بر شخص جلیل ایمش لانه و آشیانه‌سی قفقاز اقلیمی‌ایمش و الطاف الهیّه ایله غایت رزین و متین‌ایمش یعنی نقایص و رذائل نفوس بشریّه‌دن محفوظ و مصون بر حصن حصین‌ایمش هر نه ایسه فال خیر ایده‌لم و سیر ایده‌لم تفلیسی نفیس ایده‌لم و هر وحشتزده‌یی انیس ایده‌لم شیروانی ایوان ایده‌لم گنجه‌یی گنج بی‌پایان ایده‌لم قفقازی دلبر طنّاز ایده‌لم و مبتلای حرمان اولانلری همدم و همراز ایده‌لم یعنی عموم خلق ایله خُلق رحمانی ایله معامله ایده‌لم و کافّۀ بشری راه نجات و نجاحه رهبر اوله‌لم عموم امم‌ایله کمال صدق و امانت و محبّت و وفا ایله معاشرت ایده‌لم هر درده درمان اوله‌لم و هر یاره‌یه مرهم دل و جان اوله‌لم نوع انسانه مهربان اوله‌لم و علیکم التّحیّة و الثّنآء ع ع