جناب میرزا ابراهیم شیشوانی علیه بهآء اللّه الأبهی ملاحظه نمایند
نوبهار اولدی آچلدی نوگل رعنای حقّ
نغمۀ جانسوزه باشلر بلبل گویای حقّ
مطرب بزم الهی چنگ معنی ساز ایدوب
گل گولر آغلر دمادم دیدۀ بینای حقّ
آتش نمرودیان اولدی گلستان خلیل
چونکه گوکلنده طوتشدی شعلۀ موسای حقّ
وادی ایمن سراسر گلشن توحید اولوب
چونکه روشن ایلدی نور خدا سینای حقّ
نفحۀ روح القدس اولدی جهانه منتشر
اسم اعظم فیضی‌در هر نفخۀ عیسای حقّ
اولدی گلزار و گلستان محفل روحانیان
گل گبی صد جلوه ایلر دلبر زیبای حقّ
پردۀ ستر و حجابی پاره پاره ایتمادن
قنغی دلداده اولور رسوای حقّ شیدای حقّ
ای دل بیچاره بیک یاره سکا اکسک دگل
تا که دوره باشلدی جام می و صهبای حقّ
جناب میرزا علینک اشعاری اوقنوب حلاوت معناسی قلبه بر انجذاب ایراث ایتمسیله بو غزل تنظیم اولنه‌رق الحان مرغان چمنستان حقیقتله تغنّی و ترتیل اولنه ع ع