بنک عثمانیده مستخدم نوری صادق افندی حضرتلری
١٧ آغستوس سنه ١٩١٩ تاریخیله ورود ایدن نامۀ نامیلری مآل منیفی قرین اذعان مشتاقلری اولدی وجود شریفلرینه عارض اولان راحتسزلقدن و نتیجه‌سی عملیّات جرّاحیه اجرا اولندیغندن فوق‌العاده متأثّر قالدم نهایت اسم اعظمه مداومت بیوریلدیغندن شفای تامّه حصولندن ممنون و متشکّر اولدم مصردن حرکتله حیفادن مرور ایدرایکن ملاقات نهایت آرزو اولدیغی حالده حاصل اولمدیغی جهتله محزون قالدیقلرندن بنی دخی دلخون ایلدی آنجق بیروت حیفایه یقین اولمق مناسبتیله ذهاب و ایاب ایلروده حاصل اولمسی ممکن اولدیغی جهتله تلافی مافات ممکندر استنابوله رأساً مسافرت مجبوریّتنده ایکن غیر مرئی بر جریان توفیق واسطه‌سیله شاطی عرفانه یاقلاشلدقلری بو دخی بر تأیید ربّانیدر روحاً جسماً موفّقیّت علیّه‌لری ایچون هر وقت درگاه ربوبیّته مراجعت اولنور عزیزم